Tag Archives: මිනූ

ඇයි එයා වැරදි නමක් කිව්වම බලන්නේ

මිනූ school යනවනේ, එයාට නෑදෑයෝ ගැන පවුලේ අය ගැන කියල දෙනවා. school එකේ කියලා දෙන්නේ අම්මගේ අම්මා ආච්චී කියලා, ඒත් අනූයි මිනූයි අම්මගේ අම්මට කියන්නේ අම්මම්මා කියලනේ. මේක නිසා දවසක් අම්මා මිනූට මේ කතාව පැහැදිලි කරලා දුන්නා.

මිනූ හොඳට අහගෙන හිටියා, ඊට පස්සේ අහනවා.

මිනූ : ඇයි එයා වැරදි නමක් කිව්වමබලන්නේ ?
අම්මා : ඒ කියන්නේ…
මිනූ : දැන් මම මිනුකි නේ, මට සඳළි කියල කතා කලාට මම බලන්නේ නැහැ නේ. ඇයි ඉතින් අම්මම්මා බලන්නේ ?

පේනව නේද මිනූගෙ තර්ක.

Advertisements

කට රතුවෙන පැණි

අනූ ලෙඩ වෙලා බෙහෙත් ගෙනාවා, එතන බෙහෙත් පැණි දෙක තුනක්ම තිබුනා. අනූට ඉතින් බෙහෙත් බීල ඉවර වෙලා වතුර බොන්න අමතක වෙනවා. අම්මටත් වතුර ටිකක් ඉක්මනට දෙන්න ඕනේ කියල තේරුනේ නෑ. බෙහෙත් ටිකත් පැණි රසයිනේ අනූටත් ඉතින් වතුර බොන්න කට සෝදන්න හදිස්සියක් නෑ.

ඒත් දවසක් දෙකක් යද්දි අනූගේ කට රතු පාට වෙන්න ගත්තා. අම්මයි තාත්තයි බයවෙලා අනූව doctor ලඟට අරගෙන ගියා. එතකොට තමයි දැනගත්තේ කට රතුවෙලා තියෙන්නේ බෙහෙත් කටේ තියාගෙන හිටිය නිසා කියලා. Doctor ඉතින් ඒකටත් බෙහෙතක් දුන්නා.

ඒ බෙහෙත් වලට අනූගේ ලෙඩ හොඳවුනා, ඒත් මිනූට ලොකු ප්‍රශ්ණයක්

මිනූ : අම්මේ බෙහෙත් බීලා වතුර බිව්වේ නැති උනාම කට රතු වෙනවද?
අම්මා : ඔව්..
මිනූ : එතකොට ආයෙත් බෙහෙත් දෙනවද?
අම්මා : ඔව්..
මිනූ : ඒවා බීල වතුර බිව්වෙ නැත්නම් ?

ඔන්න මිනූට තියෙන ප්‍රශ්ණ….

චිත්‍රපටියකින් කොන්ඩෙ බැඳගෙන එන්න

මිනූ school යන මුල්ම දවස, අම්මයි තාත්තයි එක්ක සුදු ගවුමකුත් ඇඳගෙන නිල් පාට ටයි එකත් දාගෙන ලොක්කි වගේ ගියා. Open area එකක ළමයින්ට වාඩි වෙන්න හදලා තිබුනා, අම්මල තාත්තලා ටිකක් ඈතින් හිටියෙ. හාමුදුරු නමක් පොඩි අවවාද ටිකක් දුන්නා ළමයින්ට, ප්‍රින්සිපල් මැඩම් කතා කලා, Grade 2 අක්කලා නැටුම් නැටුවා, මේ ඔක්කොම බලලා කෑම බීමත් කාලා මිනූට හරි සතුටුයි. ගෙදර එන ගමන් අම්මා මිනූගෙන් විස්තර අහනවා.

අම්මා : පුතේ ලොකු school එක හොඳයි නේද?
මිනූ : ඔව්
අම්මා : මැඩම් මොනවාද පුතේ කිව්වේ?
මිනූ : හ්ම්ම්ම්….(මිනූ කල්පනා කරනවා )
අම්මා : පරක්කු වෙලා school එන්න එපා කිව්වා නේද?
මිනූ : නෑ… පරක්කුවෙලා ආවට කමක් නෑ කිව්වා.

පළවෙනි පාඩම හරි 🙂

අම්මා : කොන්ඩෙ ගැන මොනවද පුතේ කිව්වේ.
මිනූ : කොන්ඩ දෙකක් ගොතල, චිත්‍රපටියකින් බැඳගෙන එන්න කිව්වා.

අම්මා මිනූගෙ කොන්ඩෙ කපන්න අරගෙන ගියා කියලා මිනූ පොඩ්ඩක් තරහ වෙලා හිටියෙ. ප්‍රින්සිපල් මැඩම් කිව්වා පොඩි ළමයින්ට කොට කොන්ඩයක් තිබුනම ලේසියි කියලා. ඒකයි අම්මා කොන්ඩෙ ගැන ඇහුවේ.
තව කිව්වා කොන්ඩෙ දිගයි නං ගොතලා පීත්ත පටියකින් බැඳගෙන එන්න කියලා.

මිනූ පීත්ත පටි දන්නේ නෑ, චිත්‍රපටි නං දන්නවා.

අම්මට තියෙන ලෙඩේ…

මිනූ දවසක් අත්තම්මලයි ගෙදර ගියා. එහේ නැන්දගේ මල්ලි බබා ඉන්නවනේ, එයාගේ සෙල්ලං stethoscope එකක් අරගෙන මිනූ සෙල්ලම පටන් ගත්තා.

එයා doctor එක එක්කෙනා මිනූගෙන් බෙහෙත් ගන්නවා. තාත්තා ලඟට ගිහින් කැස්සට බෙහෙත් දුන්නා, අක්කට උනට බෙහෙත් දුන්නා. ඊලඟට අම්මා ලඟට ආවා. ඇවිත් stethoscope එක තියල බලල බෙහෙත් ටිකක් දුන්නා.

අම්මා : මොකද්ද පුතේ මට තියෙන ලෙඩේ?

මිනූ කල්පනා කරනවා…..

මිනූ: ඔයාට තියෙන්නේ බනින ලෙඩේ.
ඇත්ත තමයි, මුළු දවසම බනිනවනේ කරන වැඩවලට.

කෝවිල…

අනූයි, මිනූයි, අම්මයි, තාත්තයි ගමනක් යනගමන් මඟදි අම්මා එක එක දේවල් පෙන්නනවා. අම්මා දැක්කා කෝවිලක් තියෙනවා, අර බලන්න පුතේ කෝවිලක් අම්මා මිනූට කිව්වා.

මිනූ: කෝ… විලක්

අම්මා: විලක් නෙමෙයි පුතේ, කෝවිලක්.

මිනූ: කෝ… විලක්

අම්මා: ඒක කෝවිලක්. අපි පන්සල් යනව වගේ හින්දු අය කෝවිල් යනවා.

මිනූ: කෝ ඉතින් විලක්

මිනූ හොඳටම දන්නවා අම්මා මොකද්ද කියන්නේ කියලා. මේ හොර කෙල්ල…

ජොන්සන් ගේ කතා

මිනූ school යන පාරේ ඇලක් තියෙනවා, ඇලක් කිව්වට මේක ටිකක් ලොකුයි, ටිකක් ලොකු කුනු ඇලක්. මේ ඇලේ ඉන්නවා කිඹුලෙක්. ඉන්නවා කිව්වට මිනූ දැකල නෑ, අම්මා තමයි දවසක් දැකල ඇවිත් මිනූට කිව්වේ. එදා ඉඳලා මිනූ ඇල දැකපු ගමන්ම කිඹුල ගැන තමයි කතාව. මිනූ කිඹුලට නමකුත් දැම්මා “ජොන්සන්” අනූ කිඹුලට surname එකක් දැම්මා “විජේසේකර” (අනූගෙ class එකේ යාළුවෙකුගෙ surname එකක්).

දැන් ඉතිං ජොන්සන් විජේසේකර ගැන කතා ගොඩයි. ජොන්සන්ට අම්ම කෙනෙක් ඉන්නවා, ජොන්සන්ගෙ පුතා school යනවා, ජොන්සන් අද උදේට කෑවේ මේවා, ඔය වගේ කතා ගොඩායි. මිනූට ජොන්සන් ගැන ප්‍රශ්ණත් ගොඩයි.

මුලින්ම පොඩි පොඩි ප්‍රශ්න:
අම්මා ජොන්සන්ගෙ ගෙදර තියෙන්නෙ කොහෙද?
අම්මා ජොන්සන් නිදා ගන්නේ කොහෙද?

ඊට පස්සේ analyse කරනවා:
ජොන්සන් පීනනවද?
එයාට මාළුන්ට වගේ වරලක් නැහැනේ
එයා වතුරෙමද ඉන්නේ ගොඩටත් එනවද?

අළුත්ම ප්‍රශ්නේ තමයි:
අම්මා ජොන්සන්ට දාඩිය දැම්මම එයාගේ අම්මා එයාට පවන් ගහන්නේ කොහොමද?

ඇත්ත තමයි කොහොමද වතුර ඇතුලෙ පවන් ගහන්නේ 🙂

කැස්ස පැණිය

මිනූයි අම්මයි උදේම ගියා මිනූට බෙහෙත් ගන්න. මිනූ ඉතින් නිතරම ලෙඩක් නේ. ගිහින් එනගමන් අම්මාට කැස්සක් ආවා, ඉතිං අම්මා මිනූට කියනවා.

අම්මා: පුතේ ගෙදර ගියාම මට කැස්ස පැණි ටිකක් බොන්න මතක් කරන්න.
මිනූ    :හා.. ඒවා බොන්නේ කැස්සටද?
අම්මා: ඔව්
මිනූ    :කැස්ස වැඩි වෙන්නද? අඩු වෙන්නද?
අම්මා:කෙල්ල….දැන් නං හොඳටම ගානට වැඩියි….
මිනූ    :ඉතිං මම ඇහුව විතරනේ බෙහෙත් පෙව්වේ නැහනේ

ඔන්න ඔහොමයි චූටි මිනූගෙ කතා.