ඇඟේ අමාරුව

අනූයි මිනූයි අම්මයි තාත්තයි අම්මම්මලයි ගෙදර ගියා. සරෝ අක්කයි නෙතූ අක්කයි ඉන්නවනේ ඒ ලඟම. ඉතින් මේ ඔක්කොම එක ගෙදරක තමයි ඉන්නේ ගියපු දවසේ ඉඳන්ම. එක ගෙදරක කියන්නේ, හතරදෙනාම අම්මම්මලයි ගෙදර නැත්නං හතරදෙනාම ලොකු අම්මලයි ගෙදර.

ඉතින් ඔන්න අනූගෙ අම්මා මෙයාලට කිව්වා අද හවසට අපි ගෙදර යන්න ඕනෙ කියලා. ඒත් එදා හවස සරෝ අක්කටයි නෙතූ අක්කටයි class, දැන් ඉතින් ප්‍රශ්ණ ගොඩයි.

නෙතූ : චූටි අම්මේ ඔයාල අදම යනවද?
චූටි අම්මා : ඔව් හෙට වැඩනේ
නෙතූ : අනේ අපිට class නේ
චූටි අම්මා : ඉතින් අපිනේ යන්නේ
සරෝ : ඔයාලා අපි class ගිහින් එනකල් ඉඳලද යන්නේ
චූටි අම්මා : අනේ මට එච්චර ඇඟේ අමාරුවක් නෑ
සරෝ : ඒ උනාට අපිට තියෙනවනේ….

මේ දෙන්න class cut කරන්නයි මේ ට්‍රයි එක.

Advertisements

ඇයි එයා වැරදි නමක් කිව්වම බලන්නේ

මිනූ school යනවනේ, එයාට නෑදෑයෝ ගැන පවුලේ අය ගැන කියල දෙනවා. school එකේ කියලා දෙන්නේ අම්මගේ අම්මා ආච්චී කියලා, ඒත් අනූයි මිනූයි අම්මගේ අම්මට කියන්නේ අම්මම්මා කියලනේ. මේක නිසා දවසක් අම්මා මිනූට මේ කතාව පැහැදිලි කරලා දුන්නා.

මිනූ හොඳට අහගෙන හිටියා, ඊට පස්සේ අහනවා.

මිනූ : ඇයි එයා වැරදි නමක් කිව්වමබලන්නේ ?
අම්මා : ඒ කියන්නේ…
මිනූ : දැන් මම මිනුකි නේ, මට සඳළි කියල කතා කලාට මම බලන්නේ නැහැ නේ. ඇයි ඉතින් අම්මම්මා බලන්නේ ?

පේනව නේද මිනූගෙ තර්ක.

කට රතුවෙන පැණි

අනූ ලෙඩ වෙලා බෙහෙත් ගෙනාවා, එතන බෙහෙත් පැණි දෙක තුනක්ම තිබුනා. අනූට ඉතින් බෙහෙත් බීල ඉවර වෙලා වතුර බොන්න අමතක වෙනවා. අම්මටත් වතුර ටිකක් ඉක්මනට දෙන්න ඕනේ කියල තේරුනේ නෑ. බෙහෙත් ටිකත් පැණි රසයිනේ අනූටත් ඉතින් වතුර බොන්න කට සෝදන්න හදිස්සියක් නෑ.

ඒත් දවසක් දෙකක් යද්දි අනූගේ කට රතු පාට වෙන්න ගත්තා. අම්මයි තාත්තයි බයවෙලා අනූව doctor ලඟට අරගෙන ගියා. එතකොට තමයි දැනගත්තේ කට රතුවෙලා තියෙන්නේ බෙහෙත් කටේ තියාගෙන හිටිය නිසා කියලා. Doctor ඉතින් ඒකටත් බෙහෙතක් දුන්නා.

ඒ බෙහෙත් වලට අනූගේ ලෙඩ හොඳවුනා, ඒත් මිනූට ලොකු ප්‍රශ්ණයක්

මිනූ : අම්මේ බෙහෙත් බීලා වතුර බිව්වේ නැති උනාම කට රතු වෙනවද?
අම්මා : ඔව්..
මිනූ : එතකොට ආයෙත් බෙහෙත් දෙනවද?
අම්මා : ඔව්..
මිනූ : ඒවා බීල වතුර බිව්වෙ නැත්නම් ?

ඔන්න මිනූට තියෙන ප්‍රශ්ණ….

කඳුළු

Image result for tear drop

කඳුළු වලට පුලුවන්නම්
ගංගා වෙන් එතෙර වෙන්න
එහෙනම් නෑ මහන්සියක්
තනි ඔරුවක් හදාගන්න

කඳුළු වලට පුලුවන්නම්
මේ බර පොදි බිම තියන්න
ආයෙත් දවසක පුලුවන්
සැහැල්ලුවෙන් ඉගිල්ලෙන්න

කඳුළු වලට පුලුවන්නම්
මගෙ හිත සුවපත් කරන්න
එහෙනම් දැන් බොහෝ කලක්
සංසාරෙන් එතෙර වෙන්න

ඒත් කඳුළකට පුලුවන්
නුඹෙ ඇස් මා වෙත යොමන්න
එදාට නුඹටත් පුලුවන්
මගේ කඳුළු බෙදාගන්න

නැත්නම් නුඹටත් පුලුවන්
මගේ කඳුළට හිනා වෙන්න…..

තාත්තා ඔයාට ආදරෙයි

අත්තම්මා අනූලට තැඹිළි එවලා, අනූයි අම්මයි තැඹිළි ගෙඩියක් කපනවා එලියේ. තාත්තා ගේ ඇතුලේ වැඩක් කර කර හිටියේ, අම්මා අනූට කියනවා. කෝ අනේ ඔයාගේ තාත්තා එන්නේ නැද්ද අපට උදව් කරන්න.

අනූ කැමතිනෑ තාත්තට මොනවත් කියනවට.

අනූ – මගේ තාත්තා ඔයාට ආදරෙයි
අම්මා – ඇත්තද? ඔයා කොහොමද දන්නේ?
අනූ – මම දන්නවා
අම්මා – ඔයාට කිව්වද?
අනූ – නෑ
අම්මා – එහෙනං කොහොමද ඔය දැන ගත්තේ?
අනූ – එයා ඔයාට පෙන්ඩන්ට් එකක් අරන් දුන්නනේ.. අන්න එදා තමයි මම දැනගත්තේ…

ඉත්තෑවෙක් ගන්න

අනූයි මිනූයි කාමරේ සෙල්ලම් කරනවා snack & ladders අම්මත් හොඳට අහගෙන ඉන්නේ මොකද මේදෙන්නගෙ සෙල්ලම කොයිවෙලාවේ රන්ඩුවක් වෙයිද දන්නෙ නැහැනේ.

මිනූ කියනවා අක්කට ඔයා ඉත්තෑවෙක් ගන්නකෝ
අක්කා – ඉත්තෑවෙක් ?
මිනූ – හරි ඉත්තෑ පැටියෙක් ගන්නකෝ

Related image

අම්මත් හෙමීට ඔළුව දාලා බැලුවා.

අක්කා – මිනූ, ඉත්තෑවෙක් නෙමෙයි ඉත්තෙක්…. 🙂

චිත්‍රපටියකින් කොන්ඩෙ බැඳගෙන එන්න

මිනූ school යන මුල්ම දවස, අම්මයි තාත්තයි එක්ක සුදු ගවුමකුත් ඇඳගෙන නිල් පාට ටයි එකත් දාගෙන ලොක්කි වගේ ගියා. Open area එකක ළමයින්ට වාඩි වෙන්න හදලා තිබුනා, අම්මල තාත්තලා ටිකක් ඈතින් හිටියෙ. හාමුදුරු නමක් පොඩි අවවාද ටිකක් දුන්නා ළමයින්ට, ප්‍රින්සිපල් මැඩම් කතා කලා, Grade 2 අක්කලා නැටුම් නැටුවා, මේ ඔක්කොම බලලා කෑම බීමත් කාලා මිනූට හරි සතුටුයි. ගෙදර එන ගමන් අම්මා මිනූගෙන් විස්තර අහනවා.

අම්මා : පුතේ ලොකු school එක හොඳයි නේද?
මිනූ : ඔව්
අම්මා : මැඩම් මොනවාද පුතේ කිව්වේ?
මිනූ : හ්ම්ම්ම්….(මිනූ කල්පනා කරනවා )
අම්මා : පරක්කු වෙලා school එන්න එපා කිව්වා නේද?
මිනූ : නෑ… පරක්කුවෙලා ආවට කමක් නෑ කිව්වා.

පළවෙනි පාඩම හරි 🙂

අම්මා : කොන්ඩෙ ගැන මොනවද පුතේ කිව්වේ.
මිනූ : කොන්ඩ දෙකක් ගොතල, චිත්‍රපටියකින් බැඳගෙන එන්න කිව්වා.

අම්මා මිනූගෙ කොන්ඩෙ කපන්න අරගෙන ගියා කියලා මිනූ පොඩ්ඩක් තරහ වෙලා හිටියෙ. ප්‍රින්සිපල් මැඩම් කිව්වා පොඩි ළමයින්ට කොට කොන්ඩයක් තිබුනම ලේසියි කියලා. ඒකයි අම්මා කොන්ඩෙ ගැන ඇහුවේ.
තව කිව්වා කොන්ඩෙ දිගයි නං ගොතලා පීත්ත පටියකින් බැඳගෙන එන්න කියලා.

මිනූ පීත්ත පටි දන්නේ නෑ, චිත්‍රපටි නං දන්නවා.